Dili, 6 Outubru 2025, komisaun organizadora Maratona Internasionál Dili 2025 ho orgullu fó sai katak Banco Nacional de Comércio de Timor-Leste, S.A. (BNCTL) hola parte ona nu'udar Patrosinadór Nivel Prata ho. Parseria signifikante ida ne’e hatudu kompromisu husi banku boot liu iha nasaun ne’e atu promove saúde, bem-estar, no dezenvolvimentu komunitáriu iha Timor-Leste laran tomak.
Nota entendimentu asina husi Xefi Kaza Sivil Prezidénsia Repúblika, Sra. Jesuína Maria Ferreira Gomes, no Membru Komité Ezekutivu BNCTL, Sr. Joaquim dos Reis Martins. Patrosíniu sei apoia diretamente ba lojístika eventu nian, servisu partisipante sira nian, no programa sira divulgasaun komunidade nian ne'ebé asosiadu ho maratona.
BNCTL nia na’in tomak mak Estadu Timor-Leste nian no hamriik nu’udar banku boot liu iha nasaun ida ne’e ho sukursál no unidade 29 iha munisípiu hotu, ATM 65 ne’ebé ativu, no terminál POS ne’ebé rejistu hamutuk 322, BNCTL atende maizumenus kliente 380,000ne’ebé reprezenta 73% husi kuota merkadu, no kliente sira nia depózitu kuaze USD 500,000 (dolar amerikanu rihun atus lima), ida-ne’e ida-ne’e refleta públiku nia konfiansa mai Banku ninia integridade no dezempeñu ne’ebé konfiável BNCTL kontinua dudu inkluzaun finanseira no transformasaun dijitál iha Timor-Leste laran tomak.
Membru Komité Ezekutivu BNCTL, Sr. Joaquim dos Reis Martins, afirma: “BNCTL sente onradu atu apoia Maratona Internasionál Dili 2025 nu’udar patrosinadór Nivel Prata, eventu ne’e hatudu valór sira ne’ebé ami kaer metin – unidade komunitária, moris saudavel, no solidariedade internasionál. Ami nia kontribuisaun reflete ami nia kompromisu ba inisiativa sira ne'ebé halibur ita-nia povu hamutuk no hatudu Timor-Leste nia espíritu reziliensia no pás ba mundu. Ami sente orgullu hodi apoia eventu ida ne’ebé halo advokasia ba rezolusaun pasífika enkuantu selebra adezaun tomak Timor-Leste nian iha ASEAN.”
Maratona Internasionál Dili 2025 ho tema “Halai ba Palestina,” ho patrosíniu husi Prezidente no Laureadu Nobel ba Pás, S.E. J. Ramos-Horta, realiza ho kolaborasaun hamutuk ho IX Governu Konstitusionál, Ministériu Juventude, Desportu, Arte no Kultura, no Federasaun Atletizmu Timor-Leste. Eventu ne'e sei hala'o iha loron 11 fulan-Outubru tinan 2025, sei iha kategoria korrida oioin inklui maratona kompletu (42.195km), meia-maratona (21.098km), eventu para-atletizmu (10km), no halai divertidu 3km ne'ebé apropriadu ba família no komunidade sira. Korrida hotu-hotu sei hahú no remata iha prestijiozu Palásiu Prezidensiál Nicolau Lobato, simboliza unidade nasionál no valór demokrátiku sira.
Xefe Kaza Sivil Prezidénsia Repúblika Sra. Jesuína Gomes, haktuir: “Desportu iha kbiit atu halibur komunidade sira no promove valór pozitivu sira. Tema ‘Halai ba Palestina’ rezoan ho ita-nia nasaun nia viajen rasik ba pás no independénsia. Parseria ho BNCTL hametin ita-nia abilidade atu atu fornese esperiénsia maratona klase mundiál. Sira nia kontribuisaun, kombina ho sira nia rede extensiva iha Timór-Leste tomak, sei ajuda ita atu enkoraja partisipasaun liu-tan iha eventu istóriku ida ne'e."
Harii iha tinan 2010 husi Prezidente no Laureadu Nobel ba Pás, J. Ramos-Horta, Maratona Internasionál Dili ho objetivu atu promove saúde, bem-estar, no turizmu. Eventu ne'e halibur partisipante lokál no internasionál sira iha selebrasaun ba desportu no reziliénsia nian. Edisaun 2025, ho tema "Halai ba Palestina", defende rezolusaun pasífika sira enkuantu selebra Timor-Leste nia adezaun ba ASEAN. Eventu ne'e hein atu atrai partisipante atus resin, hodi fó impulsu signifikativu ba turizmu lokál. Rejistu taka iha loron 8 fulan-Outubru tinan 2025.
Atu hetan informasaun liután kona-ba kategoria korrida nian, perkursu, no atu rejista, vizita sítiu ofisiál iha https://dilimarathon.tl ka akompaña eventu iha nia kanál ofisiál mídia sosiál sira.