Liquiça, 02 Maiu 2025 – Banku Nasionál Komérsiu Timor-Leste (BNCTL) realiza Serimónia Lansamentu Fatuk Dahuluk Konstrusaun Edifísiu Foun BNCTL iha Munisipiu Liquiça, Postu Administrativu Liquiça Vila, Suku Dato.

Iha intervensaun, Prezidente Konsellu Administrasaun BNCTL, Sr. Januario da Gama agradese ba Prezidente Autoridade Munisípiu Liquiça, Autoridade Lokál, Polísia Nasionál Timor-Leste (PNTL), Koordenadór Jerál MCAE no parte hotu ne’ebé mak envolve iha projetu ida ne’e.

Nia informa, objetivu hosi expansaun ne’e atu mellora asesibilidade servisu banku nian ba komunidade hodi fó atendimentu ne’ebé dignu no konveniente liu ba kliente sira.

Lansamentu Fatuk Dahuluk ida ne’e simboliza dezenvolvimentu nasionál no esforsu koletivu ba ekonómia inkluzivu. Banku ne’e sei fó asesu ba servisu bankáriu ba ema hotu, ho profisionalizmu, transparénsia no governasaun di’ak. Iha diskursu Sr. Jorge Rui de Carvalho Martins, Koordenadór Jerál MCAE.

Iha sorin seluk, Prezidente Autoridade Munisípiu Liquiça, Sr. Paulino Ribeiro agradese ba BNCTL ne’ebé harii ona edifísiu foun hodi fó atendimentu ba komunidade Liquiça no lori dezenvolvimentu ekonómia ba populasaun sira hotu.

Serimónia lansamentu refere hetan partisipasaun hosi Autoridade Lokál, reprezentante MCAE, PNTL, reprezentante Igreja, Komunidade no funsionáriu BNCTL rasik.